Görünə-görünə görünməz oldum,

Dilim üsyan etdi lal, dinməz oldum.

Ürəyim məzarlıq, mən künbəz oldum,

Gəl ziyarət elə a yoldan ötən.

 

Demirəm ki, dönüb müqəddəs oldum,

Hamıya çatmayan bir ün, səs oldum.

Haraya çevrildim, döndüm "sos" oldum,

Gəl ziyarət elə, a yoldan ötən.

 

Mən elə pünhanam başdan, binadan,

Niyə doğulmuşam, niyə anadan?

Elə küskünəm ki, elə dünyadan,

Gəl ziyarət elə a yoldan ötən.

 

Baş aça bilmirəm, sirr üstə sirrəm,

Yerə naməhrəməm, Göyə əsirəm.

Vulkanam-qorxuram birdən püskürrəm,

Gəl ziyarət elə a yoldan ötən.

 

Aləmi yandıran od, ocaq ollam,

Dəniz tufanında adacıq ollam.

Qorxuram "bermud" tək üçbucaq ollam,

Gəl ziyarət elə a yoldan ötən.

 

Bu idrak, bu dərkin ziyarətgahı,

Təfəkkürdən gələn anlamın ahı.

Xəzangül adlanan günü, sabahı,

 Gəl ziyarət elə a yoldan ötən.

   Xəzangül

 

  

  Bu gecə yuxuda uçurdum Allah!

Yerdən Göy üzünə qaçırdım Allah!.

Dərdimi Tanrıya açırdım Allah!

Yerdən daş atdılar Göyə çatmadı.

 

Bu gecə göylərdə mələyə döndüm,

Bu gecə  göylərdə haraydım, ündüm.

Tanrının önündə Rəsul tək dindim,

Yerdən baş qatdılar göylər baxmadı.

 

Danışdım göylərə mən yer dərdimi,

Qurtarası deyil, dərdim birdimi.

İstədim Yer üçün mən Göy yardımı,

Göylər bulud verdi,

şimşək çaxmadı.

 

Yerlə Göy arası xeyli dolaşdım,

Göydə Günəş oldum, yerdə gül açdım

Bilmədim mən necə, necə dil açdım,

Göy dili danışdım, Yerim qorxmadı.

 

Göy dili danışdım, vallah çaşmışam,

İdrakım köklənib dərkə qoşmuşam.

Yer, Göy sərhəddini yəqin aşmışam,

Mən kiməm? Ha sordum cavab çıxmadı.

 

Mən kiməm? Fikrimdə nələr yozurdum,

Bu vaxt taleyimi yazan yazırdı.

Tanrının sağında yerim hazırdı,

Bu tanrı vəhyidi, bunun yox adı.

    Xəzangül.

 

 

Elə istiyirəm ki, bu hobbi haqqında elə ifadələr işlədim ki,poeziyanın iç dünyamda yaratdığızəlzələmi deyim, fırtınamı deyim, nə deyim ki, ifadə eliyə bilim. Yox elə söz yoxdu,söz xəzinəmdə.Bəlkə elə təfəkkür dili lazımdıki,təhtəlşüurla yazılan ,əslində vəhy olunan poetik misralarin yaranış anını izah edə bilsinşBəlkə Göy dili lazımdı?